وانا الذي ماخنت حبك وانا حي ... وانت الذي عزيتني في وفاتي

ماقلتلك لامن بغيت اتركك عي
وماقلتلي انك معي في وصاتي

ماقلتلي ماخون حبك وانا حي
ماخون لو جار الدهر لاتحاتي

واليوم ياخاين طويت العهد طي
طي الورق في سلة المهملاتي

لحظه قبل لاكنسل الحب والغي
الغي معالم كارثت ذكرياتي

لحظه قبل تمشي ابي اطلبك شي
عطني دقايق بس ألملم شتاتي

لحظه ابي من وقتك الغالي شوي
ماقصدي العب بالمشاعر وتاتي

لحظه قبل ترحل ابي تستمع لي
بعطيك موجز مختصر عن حياتي

انا الذي في ضيقتك صرت لك في
وانت الذي حطمت كل امنياتي

وانا الذي في عتمتك صرت لك ضي
وانت الذي حرمتني من سباتي

وانا الذي ماخنت حبك وانا حي
وانت الذي عزيتني في وفاتي

لحظه قبل لاتشرهه العين بمشي
قبل اتسابق عبرتي وانهتاتي

والحين بعلن حالة فراق ونهي
يالله حسن الخاتمه في مماتي

تعبت اجاهد لهفة الشوق ووفي
بقرا عليك الفاتحه في صلاتي

ماقلتلك لامن بغيت اتركك عي
الحين روح ولاتحقق وصاتي